tamam umr faqat us ki justuju karna
tum us ko yaad bhi karna to ba-wazu karna

zamana aap ko eazaz se nawazega
shafiq lahje mein chhoton se guftugu karna

wo apne aap ko ahl-e-zaban samajhte hain
zara sikha de koi un ko guftugu karna

tum intizar ke wadon ke tir barsao
hamara kaam hai dil ko lahu lahu karna

hijab hatne de 'kashfi' tu ajnabiyyat ka
phir is ke baad bila-khauf tum se tu karna