taraqqi aur raftar-e-zamana
hasin unwan huzn-agin fasana

jo badle nit naya ek aastana
bhala aisi jabin ka kya thikana

tere fikr-o-amal sab shairana
na badla tu ye badle kyon zamana

qadam ishq-o-junun ke fatehana
khirad ki chaal sab hila bahana

mubarak us ka azm-e-muslihana
khafa hon jis se abna-e-zamana

khumar-e-subh kya kaif-e-shabana
mujhe bakhsha surur-e-jawedana

wo aansu jo karam ko jazb kar len
wahi hai mere daman ka khazana

tumhein zauq-e-hadis-e-dil-barana
ghazal 'arif' ki fikr-e-arifana