tark un se rasm-o-rah-e-mulaqat ho gai
yun mil gae kahin to koi baat ho gai

dil tha udas aalam-e-ghurbat ki sham thi
kya waqt tha ki tum se mulaqat ho gai

ye dasht-e-haul-khez ye manzil ki dhun ye shauq
ye bhi khabar nahin ki kahan raat ho gai

rasm-e-jahan na chhut saki tark-e-ishq se
jab mil gae to pursish-e-haalat ho gai

khu bu rahi sahi thi jo mujh mein khulus ki
ab wo bhi nazr-e-rasm-e-inayat ho gai

dilchasp hai 'salim' hikayat teri magar
ab so bhi ja ki yar bahut raat ho gai