tasalsul paemali ka milega
sarir-ara khizan hai kya milega

chalo dushman ko sine se laga len
kahan is shahr mein apna milega

kharaba hai ki dasht-e-nainawa hai
koi zakhmi koi pyasa milega

mere lashkar ki mitti dusri hai
saf-e-ada mein wo bhi ja milega

nahin be-wajh is girdab mein hun
kanar-e-ab bhi dariya milega

nahin be-sud naze-e-gham uthana
hisab-e-dard hai duna milega

'amin'-ashraf ki hai pahchan ye bhi
bhari mahfil mein wo tanha milega