tashkil badar ki hai kabhi hai hilal ki
duniya hai ek shabih uruj-o-zawal ki

phulon se hai ladi hui har shakh-e-gulsitan
rakh li khuda ne aabru dast-e-zawal ki

jannat-farosh huron ke dallal khirqa-posh
kya puchhte ho waiz-e-farkhanda-fal ki

in mah-washon ko parde se bahar nikal ke
duniya mitai jati hai husn-o-jamal ki

mujh ko mila hai wo dil be-muddaa 'sarir'
jis ko gham-e-firaq na hasrat visal ki