tawil raat ho aisi kinare bhi na rahen
hamare sath mein chalte sitare bhi na rahen

talash meri kisi rahguzar talak jae
na jit pae agar us ko haare bhi na rahen

hawa utar badan mera aur chaman se nikal
le chal udhar ki jidhar ye nazare bhi na rahen

mujhe ujad chuki aandhiyan palat aain
hai un ko fikr bhala hum hamare bhi na rahen

jise hai jaana chala jae umr bhar ke liye
ye roz roz ke 'tejas' khasare bhi na rahen