tera dil to nahin dil ki lagi hun
tere daman pe aansu ki nami hun

main apne shahr mein to ajnabi tha
main apne ghar mein bhi ab ajnabi hun

kahan tak mujh ko suljhate rahoge
bahut uljhi hui si zindagi hun

khabar jis ki nahin bahar kisi ko
main tah-khane ki aisi raushni hun

thakan se chur tanha soch mein gum
main pichhli raat ki wo chandni hun

mera ye hashr bhi hona tha ek din
kabhi ek chikh tha ab khamushi hun

guzar kar nek-o-bad ki har gali se
sarapa aagahi hun gumrahi hun

mera ye huzniya is daur mein hai
sukhan to hun magar na-guftani hun