tera firaq muqaddar samajh liya hum ne
ab apne-ap ko patthar samajh liya hum ne

tumhaari yaad ke palkon pe ashk raushan the
andheri shab ko munawwar samajh liya hum ne

ye khud-farebi nahin hai to aur kya kahiye
har ek sae ko paikar samajh liya hum ne

sipurd kar diye sare huquq rahzan ko
ye kis zalil ko rahbar samajh liya hum ne

tamam jism thakawat se chur chur hua
tab is zamin ko bistar samajh liya hum ne

hamari bhul thi qad mein bahut jo chhote the
unhen bhi qad ke barabar samajh liya hum ne

wo jis ne jaan aziyyat mein dal di 'mashkur'
use hi jaan se badh kar samajh liya hum ne