tera khayal agar juzw-e-zindagi na rahe
jahan mein mere liye koi dilkashi na rahe

main aa gaya hun wahan tak teri tamanna mein
jahan se koi bhi imkan-e-wapsi na rahe

tu thik kahta hai ai dost thik kahta hai
ki hum hi qabil-e-tajdid-e-dosti na rahe

huzur yaad hai maidan-e-hashr ka wada
kahin wahan bhi meri aankh dhundhti na rahe

mera to khair azal hi se gham muqaddar hai
teri nigah ki pahchan be-rukhi na rahe

tu is tarah se lipat ja charagh ki lau se
ki baad-e-marg yahan teri rakh bhi na rahe

kisi ke hijr ka mausam azab hai 'ghazni'
kabhi kabhi to main kahta hun zindagi na rahe