tera lahja teri pahchan mubarak ho tujhe
teri wahshat tera haijaan mubarak ho tujhe

main mohabbat ka pujari hun so main jata hun
yani nafrat ka ye saman mubarak ho tujhe

aankh mein tanz-o-raunat ki chamak baqi rahe
lab pe ye talkh si muskan mubarak ho tujhe

main dua karta hun tu shahr-e-charaghan mein rahe
tera har khwab-e-gulistan mubarak ho tujhe

tu hukumat ka hai shauqin tera banta hai
bebasi shahr ki sultan mubarak ho tujhe

main to mar kar bhi meri jaan bacha lunga use
tujh mein marta hua insan mubarak ho tujhe

ja raha hun main tere shahr se yaaden le kar
mere dilbar tera multan mubarak ho tujhe

ye bichhadna hi agar hal hai to ranjish kaisi
jao na jao meri jaan mubarak ho tujhe