tera nasib banun teri chahaton mein rahun
tamam umr mohabbat ki wahshaton mein rahun

khumar hasrat-e-didar mein rahun har dam
sawad-e-ishq yunhi teri shiddaton mein rahun

ye zindagi ki hararat tere sabab se hai
main lamha lamha junun ki tamazaton mein rahun

ye ehtimam-e-shab-o-roz ho meri khatir
tere khayal ki rangin khalwaton mein rahun

sanwarti hain sada jis ki chahaten mujh ko
meri dua hai ki main us ki hasraton mein rahun

ai abr-e-wasl baras aur khul ke mujh pe baras
main bhigi bhigi hawa ki shararaton mein rahun

sharik-e-shauq-e-safar hai agar wo mera 'naz'
main kyun na mausam-e-gul ki bashaaraton mein rahun