tera suluk mujh se hai aghyar ki tarah
aankhon mein jo khatakta hun main khar ki tarah

mubham har ek baat sanam ki lage mujhe
iqrar bhi lage mujhe inkar ki tarah

shatranj jaisi mujh ko lage hai ye zindagi
chalna har ek chaal samajhdar ki tarah

shair samajh ke tujh ko bulaya tha bazm mein
ghazlon ko yun na ga tu gulu-kar ki tarah

hosh-o-hawas gum hain jo us ke firaq mein
khud ko samajh raha hun main bimar ki tarah

sail tumhaare dar pe jo aae kabhi zaki
us ko nawaziye kisi dildar ki tarah

qabu mein rakh zaban ko apni sada 'zaki'
rishton ko katti hai ye talwar ki tarah