tere bimar-e-gham ki soz-o-samani nahin jati
ye aalam hai ki ab surat bhi pahchani nahin jati

dil-e-nadan ye kya zid hai ki khelunga hasinon mein
are kam-bakht teri ab bhi nadani nahin jati

na jaane kis ki zulfon ka nazara kar liya main ne
ki mere dil ki uljhan aur pareshani nahin jati

wo laya jam saqi shaikh ji thodi si pi bhi lo
aji do-chaar ghunton se musalmani nahin jati

jo dil deta hai 'shabbar' aaina-rukh husn walon ko
samajh lo zindagi bhar us ki hairani nahin jati