tere gham-khwar ka mamul khuda hi jaane
kis qadar rahta hai mashghul khuda hi jaane

hum ne ulfat ka sabaq sikha hai diwanon se
us ka ba-qaeda school khuda hi jaane

jubba-sai dar-e-jaanan pe kiya karta hun
kis liye kyon mera mamul khuda hi jaane

ujde gulshan mein mere dil ke bahaaren aaen
dagh-e-dil ban gae kyon phul khuda hi jaane

aaj-kal hum se wo khaif hain khilaf-e-adat
jaane kya hum se hui bhul khuda hi jaane

dekhte dekhte 'asi' ne hidayat pa li
kis tarah ho gaya maqbul khuda hi jaane