tere huzur jo do-chaar din guzar aaya
wo faiz-yab hua aaqibat sanwar aaya

nasib wale hain wade wafa hue jin ke
hamare nam jo aaya to intizar aaya

chala to chalta gaya ek junun manzil mein
agarche rasta pur-sang-o-khar-dar aaya

main aaj aaya hun khas aap ke bulawe par
agarche bazm mein pahle bhi bar bar aaya

mera chaman raha sadiyon se amn ka mehwar
ye kaun aaya ki har samt intishaar aaya

hamare ghar hi na aaya to phir bala se meri
hazar bar agar mausam-e-bahaar aaya

chhuda ke hath gaya 'nazr'-e-gul ke mausam mein
kali ko thand lagi puchhne ko khar aaya