tufan samajh liya kabhi sahil bana liya
ai shauq-e-be-aman tujhe manzil bana liya

ab jism-o-jaan-e-naz pe tuten qayamaten
us se gurez kya jise hasil bana liya

kuchh intiha-e-shauq ke the silsile ajab
mushkil nahin tha jo use mushkil bana liya

jis din ki intizar tha karna nahin kiya
khud ko mizaj-e-yar ke qabil bana liya

us rah par chale jo zamane se hat ke thi
aur kar-e-zindagi tujhe mushkil bana liya

chhoda nahin banae bana zimme jo bhi tha
phir bhi nahin kuchh aisa ki be-dil bana liya

jab chaha ai samay tujhe raunaq se kat kar
khalwat-nashini-e-shab-e-mahfil bana liya

pani hi kya hawa bhi nahin e'tibar ki
ye jaan kar thikana sar-e-gil bana liya