tere mariz ko ai jaan shifa se kya matlab
wo khush hai dard mein us ko dawa se kya matlab

faqat jo zat ke hain dil se chahne wale
unhen karishma-o-naz-o-ada se kya matlab

nihaal-e-taza rahen namiya ke minnat-kash
darakht-e-khushk ko nashw-o-numa se kya matlab

murad-o-maqsad-o-matlab hain sab hawas ke sath
hawas hi mar gai phir muddaa se kya matlab

mujhe wo puchhe to us ka hi lutf hai warna
wo baadshah hai use mujh gada se kya matlab

jo apne yar ke jaur-o-jafa mein hain masrur
unhen phir aur ke mehr-o-wafa se kya matlab

raza-e-dost jinhen chahiye ba-har-surat
'nazir' phir unhen apni raza se kya matlab