tere ushshaq ne har mod pe thukrai hai
aql wo bhik hai jo duniya utha lai hai

phut jaen meri aankhen yahi din dekhne the
teri taswir kisi ghair ne dikhlai hai

kitni mil jae kise kuchh bhi nahin kah sakte
hasb-e-taufiq tere ishq mein ruswai hai

aisi haalat to sar-e-hashr nazar aani thi
jo tere saya-e-diwar nazar aai hai

hum se bhi pher nazar hum ko bhi ruswa farma
hum ne nuqsan uthane ki qasam khai hai

ab tere khwab falak se bhi utar aaen to kya
aas ki chhat se meri nind utar aai hai

ibn-e-'jawed' ne bas gham nahin paya hai tera
ibn-e-'jawed' ne hisse ki khushi pai hai