teri aawaz par ruke hi nahin
so kai waqiye hue hi nahin

us ne jitne diye main le aaya
muft ke sans the gine hi nahin

moajize waqt par nahin hote
sanehe waqt dekhte hi nahin

jhuth hai dil-ba-dar kiye gae hain
sach kahen hum wahan pe the hi nahin

sab haqiqat-pasand ho gae hain
log ab khwab dekhte hi nahin

jo tere nam mein nahin aate
aise harfon ko jaante hi nahin

ris rahe hain jagah jagah se 'asad'
us ne kuchh zakhm to siye hi nahin