ban ban kar aaj wasl ki surat bigad gai
wo kya bigad gae meri qismat bigad gai

kahte hain aaj dukhtar-e-saqi ko dekh kar
zahid se parsa ki bhi niyyat bigad gai

achchhe bane khuda ki qasam wo shab-e-visal
ye kah ke so gae ki tabiat bigad gai

bose ke badle dil unhen deta to khub tha
afsos len-den ki surat bigad gai

'sabir' ke samne hue aise zalil ghair
izzat to kya hai un ki haqiqat bigad gai