teri dahliz pe jo khud ko jhuka sakte hain
wo koi aur qadam bhi to utha sakte hain

qais ne dasht mein itni to ijazat di hai
aap kuchh roz yahan khak uda sakte hain

lakh hi talkh shab-o-roz diye tu ne magar
zindagi tere liye hath badha sakte hain

chahchahati hui aawazon ko tarse hue log
ab bhi chahen to nae ped laga sakte hain

shor se khamushi ki samt safar karte hue
khamushi se bhi koi shor utha sakte hain