teri jafa-o-zulm ka charcha kahan nahin
aisi koi zamin hai jahan aasman nahin

alfaz se nahin hai matalib ka koi rabt
kyunkar na ek raaz bane teri han nahin

wo un ka raazdar bane bazm-e-naz mein
jis aashna-e-dard ke munh mein zaban nahin

gulchin-o-baghban bhi hain gul bhi hain bagh mein
lekin ghazab to ye hai mera aashiyan nahin

urdu unhin ki god mein phuli phali 'riyaz'
jo log kah rahe hain ye meri zaban nahin