teri nazar ke ishaaron ki baat kaun kare
zamin pe rah ke sitaron ki baat kaun kare

hamein hain ras thapede hi tund maujon ke
udas udas kinaron ki baat kaun kare

badhe na un se kahin aur dil ki virani
khizan ke din hain bahaaron ki baat kaun kare

shuur-e-fikr-o-nazar se hai ab jahan raushan
falak ke chand sitaron ki baat kaun kare

abhi hain un ke labon par masarraten raqsan
gham-e-hayat ke maron ki baat kaun kare

kise hai fursat-e-nazzargi nasib 'zaki'
kisi ke shokh nazaron ki baat kaun kare