teri rahmaton ke dayar mein tere baadalon ko pata nahin
abhi aag sard hui nahin abhi ek alaw jala nahin

meri bazm-e-dil to ujad chuki mera farsh-e-jaan to simat chuka
sabhi ja chuke mere ham-nashin magar ek shakhs gaya nahin

dar-o-baam sab ne saja liye sabhi raushni mein naha liye
meri ungliyan bhi jhulas gain magar ek charagh jala nahin

gham-e-zindagi teri rah mein shab-e-arzu teri chah mein
jo ujad gaya wo basa nahin jo bichhad gaya wo mila nahin

jo dil-o-nazar ka surur tha mere pas rah ke bhi dur tha
wahi ek gulab umid ka meri shakh-e-jaan pe khila nahin

pas-e-karwan sar-e-rahguzar main shikasta-pa hun to is liye
ki qadam to sab se mila liye mera dil kisi se mila nahin

mera ham-safar jo ajib hai to ajib-tar hun main aap bhi
mujhe manzilon ki khabar nahin use raston ka pata nahin