teri zulf zunnar ka tar hai
ki jis tar mein dil giraftar hai

karishme ke lashkar mein wo shah-e-husn
saf-e-khub-ruyan ka sardar hai

talattuf sin puchhega kab dard-e-dil
sitam-gar hai sarkash hai ayyar hai

jise dil-kharashi nahin ishq ki
tariq-e-mohabbat mein be-kar hai

sajan lutf kar nargis-e-bagh par
teri chashm-e-mai-gun ka bimar hai

shifa de mujhe marham-e-wasl sun
jigar par mere hijr ka war hai

shab-e-hijr mein gul-badan ke 'siraj'
nazar mein meri shama jiyun khar hai