tesha-ba-dast aa mere aazar tarash de
be-dol hai bahut mera paikar tarash de

gar qumriyon ke naghme giran-bar hain tujhe
is rut mein sare sarw sanobar tarash de

yun ud gai hai bu-e-wafa us ki zat se
jis tarah koi shakh-e-gul-e-tar tarash de

udna agar hai baad-e-mukhalif ka dhyan rakh
aisa na ho ki tez hawa par tarash de

kya mom ke badan ki haqiqat tere liye
tu chahe to nigahon se patthar tarash de