tha pahla safar us ki rifaqat bhi nai thi
raste bhi kathin aur masafat bhi nai thi

dil tha ki kisi taur bhi qabu mein nahin tha
rah rah ke dhadakne ki alamat bhi nai thi

jab us ne kaha tha ki mujhe ishq hai tum se
aankhon mein jo aai thi wo hairat bhi nai thi

sadiyon ke talluq ka guman hone laga tha
jab ki meri us shakhs se nisbat bhi nai thi

waqif bhi nahin tha main kisi sud-o-ziyan se
us ishq ke saude mein shirakat bhi nai thi

khwabon ke bikhar jaane ka dhadka bhi laga tha
be-dari-e-shab ki mujhe aadat bhi nai thi

tabir kahan dhundne jatin meri aankhen
un ko to kisi khwab ki zahmat bhi nai thi

dil waqif-e-adab-e-mohabbat bhi nahin tha
duniya ke riwajon se baghawat bhi nai thi

phir main ki kisi nashe ka aadi bhi nahin tha
aur mere liye wasl ki lazzat bhi nai thi

yun kar-e-junun karna khirad-mandon mein rah kar
jo dali thi tum ne wo riwayat bhi nai thi