tira-bakhti jo muqaddar ho jae
phul sa jism bhi patthar ho jae

ashk ruk jae to aankhen be-nur
aur dhal jae to gauhar ho jae

ruh sahra ki tarah pyasi hai
chashm-e-be-ab samundar ho jae

rauzan-e-shahr pe aankhen hain dhari
ai khuda wa koi manzar ho jae

ishq duniya bhi ajab duniya hai
hijr jo kate payambar ho jae

daulat-e-chashm-e-karam milte hi
taj wala bhi gadagar ho jae

ishq ki lai pe hain raqsan hum tum
kaun kab jaane qalandar ho jae