tirgi ho ki ho tanwir lahu mangegi
har nae daur ki tamir lahu mangegi

is se achchha hai ki khwabon ka bharosa na karo
khwab dekhoge to tabir lahu mangegi

dasht-e-wahshat mein to us waqt maza aaega
jab mere panw ki zanjir lahu mangegi

tum mere samne ab jang ki baaten na karo
nyam se nikli to shamshir lahu mangegi

main ye hi sochta rahta hun shab-o-roz 'akhtar'
kab talak wadi-e-kashmir lahu mangegi