to aakhir saz-e-hasti kyun tarab-ahang-e-mahfil tha
nashat-ain kaif-e-be-dili yarab agar dil tha

ba-faiz-e-be-khudi aise maqam-e-shauq mein hum the
jahan kar-e-husul-e-muddaa tahsil-e-hasil tha

maqam-e-hu suwaida-e-mujarrad aalam-e-hairat
meri gum-gashtagi se ab ye naqsha hai jahan dil tha

hamein kam-bakht ehsas-e-khudi us dar pe le baitha
hum uth jate to wo parda bhi uth jata jo hail tha

kahan zauq-e-tan-asani mein aasani mayassar thi
talash-e-rahat-e-manzil mein dil gum-karda manzil tha

shikayat sun ke aadab-e-mohabbat kah diya us ne
mujhe kah sun ke chup hona pada aakhir ki qail tha

zaban-e-'dagh' o shan-e-'zauq' kuchh is mein nahin 'natiq'
are ye kya hai tu to ham-nawa-e-'nuh' o 'sail' tha