to kya hua jo mere sath aaj tu nahin hai
faqat yahi ki hai virani haw-hu nahin hai

tumhaare sath jo ek roz meri baat na ho
to yun lage ki kisi se bhi guftugu nahin hai

ye zakhm-e-dil ki numaish nahin tamasha-garo
dar-asl baat ye hai pairahan rafu nahin hai

kisi ne dekha nahin hum ne jaise dekha use
ghalat kaha hai kisi ne wo khub-ru nahin hai

abhi abhi jo mujhe tujh pe pyar aa raha hai
khuda ka shukr ada kar tu ru-ba-ru nahin hai

main aap apna mukhalif main aap apna harif
mere alawa mera koi bhi adu nahin hai