to wo nukta hai jise dhyan mein rakkha gaya hai
ghair mumkin sahi imkan mein rakkha gaya hai

hairaten apni abhi khatm na hone dena
raaz-e-poshida ek elan mein rakkha gaya hai

sab shanasa hain tere phir bhi to tera chehra
gum-shuda logon ki pahchan mein rakkha gaya hai

tai shuda hai yahan anjam azal se sab ka
faisla waqt ke juzdan mein rakkha gaya hai

is qadar bojh ki shal ho gae bazu 'nusrat'
jaane kya kya mere saman mein rakkha gaya hai