sahra sahra bhatak rahi hun main
ab nazar aa ki thak rahi hun main

bichh rahe hain sarab rahon mein
har qadam par atak rahi hun main

kyun nazar khud ko main nahin aati
kab se aaina tak rahi hun main

hae kya waqt hai ki ab us ki
be-dili mein jhalak rahi hun main

waqt se tutta hua lamha
aur is mein dhadak rahi hun main

jis ne ruswa kiya mujhe 'nusrat'
us ke aibon ko dhak rahi hun main