tu aashna-e-jazba-e-ulfat nahin raha
dil mein tere wo zauq-e-mohabbat nahin raha

phir naghma-ha-e-qum to faza mein hain gunjte
tu hi harif-e-zauq-e-samaat nahin raha

aain kahan se aankh mein aatish-chikaniyan
dil aashna-e-soz-e-mohabbat nahin raha

gul-ha-e-husn-e-yar mein daman-kash-e-nazar
main ab haris-e-gulshan-e-jannat nahin raha

shayad junun hai mail-e-farzangi mera
main wo nahin wo aalam-e-wahshat nahin raha

mamnun hun main tera bahut marg-e-na-gahan
main ab asir-e-gardish-e-qismat nahin raha

jalwa-gah-e-khayal mein wo aa gae hain aaj
lo main rahin-e-zahmat-e-khalwat nahin raha

kya faeda hai dawa-e-ishq-e-husain se
sar mein agar wo shauq-e-shahadat nahin raha