tu mujh ko sun raha hai to sunai kyun nahin deta
ye kuchh ilzam hain mere safai kyun nahin deta

mere hanste hue lahje se dhoka kha rahe ho tum
mera utra hua chehra dikhai kyun nahin deta

nazar-andaz kar rakkha hai duniya ne tujhe kab se
kisi din apne hone ki duhai kyun nahin deta

main tujh ko dekhne se kis liye mahrum rahta hun
ata karta hai jab nazren rasai kyun nahin deta

kai lamhe chura kar rakh liye tu alag mujh se
tu mujh ko zindagi-bhar ki kamai kyun nahin deta

khud apne-ap ko hi gher kar baitha hai tu kab se
ab apne-ap se khud ko rihai kyun nahin deta

main tujh ko jit jaane ki mubarakbaad deta hun
tu mujh ko haar jaane ki badhai kyun nahin deta