tu na aaya teri yaadon ki hawa to aai
dil ke tapte hue sahra pe ghata to aai

main to samjha tha ki ab koi na apna hoga
tere kuche se magar ho ke saba to aai

mere marne ki sahi jaan se guzarne ki sahi
mere haq mein tere honton pe dua to aai

dil-dahi ka jo saliqa nahin aaya na sahi
aap ko dil ke dukhane ki ada to aai

ho gaya aap-hi-ap aaj mudawa apna
gar masiha nahin aaya to qaza to aai

mujh ko shikwa nahin ab qasim-e-qismat se 'shakeb'
kuchh na aaya mere hisse mein wafa to aai