sath ghurbat mein koi ghair na apna nikla
main faqat dard ke sahra mein akela nikla

main ne mangi thi shab-e-gham ke guzarne ki dua
aur mere ghar se bahut dur ujala nikla

koi chehra na koi aks nazar aata hai
apni taqdir ka aaina bhi andha nikla

zindagi kis se ab ummid-e-mudawa rakkhe
dushman-e-jaan to mera apna masiha nikla

wo tera rang-e-wafa ho ki tera tarz-e-jafa
main har ek rang mein taswir-e-tamanna nikla

kyun na duniya ko mere qatl pe hairat hogi
sath mere mere qatil ka janaza nikla

main bhi to kaun si rakhta hun mohabbat us se
apne dushman ki tarah main bhi to andha nikla

koi tohfa na koi khat na kisi ki taswir
aur mere ghar se tere gham ke siwa kya nikla

kat gai umr chhupae hue gham apna 'shakeb'
apne munh se na kabhi harf-e-tamanna nikla