tu ne kabhi bhi aansu baha kar nahin dekha
namnak nigahon se mana kar nahin dekha

ghairon ne kabhi hath mila kar nahin dekha
apnon ne bhi sine se laga kar nahin dekha

nazron mein khayalon mein samaya tha bahut wo
har chand use dil se laga kar nahin dekha

main jaanta tha rahti na hasti-e-samundar
main ne do kinaron ko mila kar nahin dekha

bichhda bhi to is naz se andaz se bichhda
phir us ne kabhi laut ke aa kar nahin dekha

us ne bhi kabhi pursish-e-gham ki nahin 'faisal'
main ne bhi kabhi dard suna kar nahin dekha