tujhe dekhen na kyon aashuftagi se
tujhe hum sochte hain be-khudi se

hui pamal na lafzon ki hurmat
nazar sab kah gai hai sadgi se

mohabbat ki ajab hai kimiyai
sukun pata hai dil tishna-labi se

na sil tu chaak-e-dil mere rafugar
chhupa lenge ise tira-shabi se

ye hai eajaz tera ai mohabbat
nahin shikwa hamein ab zindagi se

tere aane se tute sare rishte
khalish se karb se aazurdagi se