tujhe to aaj bhi hum be-shumar chahte hain
ek aur tarah ka lekin qarar chahte hain

hamara masala ye hai ki sham hote hi
hum apne aap se thoda farar chahte hain

palatne wale tujhe pahle hi bataya tha
kisi bhi shakhs ko hum ek bar chahte hain

ye log kyun bhala thakte dikhai dete nahin
ab aur kitna tera intizar chahte hain

hamare tajarbe itne ziyaada thik nahin
so tujh se pyar nahin e'tibar chahte hain

khuda hawas se bachae magar kai din se
tere badan pe bhi hum ikhtiyar chahte hain