tujh ko chahun meri majal kahan
bas mein lekin mera khayal kahan

tera milna muhaal hai lekin
tu jo chahe to phir muhaal kahan

ek lamha karam ka de dete
main ne mange the mah-o-sal kahan

phir nasheman qafas mein yaad aaya
main kahan aur mera khayal kahan

mai-kada jo rah-e-hayat mein ho
gumrahi ka phir ehtimal kahan

dil ne mushkil se chain paya tha
phir se aaya tera khayal kahan

wo mile bhi to ajnabi ki tarah
pursish-e-haal ka sawal kahan

jalwa-e-husn mein hua hun gum
ab yahan ja-e-qil-o-qal kahan

chup hi behtar hai is zamane mein
sunne wala hai dil ka haal kahan

kya na dekha 'habib' duniya mein
yan se jaane mein phir malal kahan