tujh ko sochon mein basa kar shaeri karta hun main
zehn-o-dil ki wadiyon mein raushni karta hun main

main tera 'ranjha' tu meri hir hai jaan-e-ghazal
chhod kar har kaam teri chaakari karta hun main

apne dil ke har waraq par nam likh likh kar tera
pesh tujh ko dhadkanon ki diary karta hun main

dub kar khwabon mein tere kho ke teri yaad mein
roz-o-shab apni khudi ko be-khudi karta hun main

is bulandi par mujhe lai hai teri aashiqi
band aankhon se tera didar bhi karta hun main

hadson mein jhonk deta hun main apne aap ko
is tarah khud se kabhi khud dil-lagi karta hun main