tujh se ab rishta nibhana bhi nahin chahta hai
dil tujhe chhod ke jaana bhi nahin chahta hai

ye ajab baat hai wo mera talabgar bhi hai
aur mujhe apna banana bhi nahin chahta hai

tu mujhe chhod raha hai to shikayat kaisi
tu mera ho ye zamana bhi nahin chahta hai

wo agar ruth gaya hai to use jaane do
ab ye dil us ko manana bhi nahin chahta hai

tujh ko fursat hi nahin hai to koi baat nahin
haal-e-dil koi sunana bhi nahin chahta hai

zulm-e-baatil ki shikayat bhi sabhi ke lab par
aur koi sang uthana bhi nahin chahta hai

main tere nam se ruswa hun mujhe fikr nahin
dil kahin aur thikana bhi nahin chahta hai

jis qadar tut ke chaha hai use main ne 'faraaz'
is tarah koi diwana bhi nahin chahta hai