tujh se milne ke liye khud ko safar par rakkha
zindagi ne mera gham bar-e-digar par rakkha

khud diye main ne jalae teri aamad ke liye
aur hawaon ko teri khair khabar par rakkha

kafi kuchh haara hun main aur badi mehnat se
aashiyan main ne to sarsabz shajar par rakkha

is masiha ne miyan zakhm diye khud mujh ko
aur ilzam kisi aur bashar par rakkha

meri manzil mein rukawat na banega 'hamza'
us ne patthar jo meri rahguzar par rakkha