tum apne mariz-e-gham-e-hijran ki khabar lo
saunpa hai agar dard to darman ki khabar lo

hanste ho abas haal-e-pareshan pe hamare
apni to zara zulf-e-pareshan ki khabar lo

yun aur mujhe khalq mein bad-nam karoge
bas hosh sambhaalo bhi gareban ki khabar lo

kis kaam ye aaegi masihai tumhaari
ehsan karo aashiq-e-be-jaan ki khabar lo

phaile hue surme ko to rumal se puchho
kya waza hai ye nargis-e-fatan ki khabar lo

kahta hai yahi tum se 'shuur'-e-jigar-afgar
saunpa hai agar dard to darman ki khabar lo