tum jo mere haal se anjaan ho
jaan lo tum hi to meri jaan ho

be-khudi ne had pakad li hai kahin
un ke aane ka koi imkan ho

shaikh-ji waiz bane dekhe jo kal
jaise nazron mein koi shaitan ho

ishq aa kar raqs karta hai yahin
dekh kar tum bhi yahi hairan ho

jis gali mein hai meri diwangi
wahshaton ka ab wahan elan ho

is qalam se ab likho aisi ghazal
jis se qail hazrat-e-insan ho

khud ko khud se khud hi ab khali karo
phenk kar koi bhi jo saman ho

ishq kaamil kah gaya aise karo
zikr un ka sans mein har aan ho

aisa aashiq mujh ko tum la do koi
neze par jis ne padha quran ho