tum khafa ho to achchha khafa ho
ai buto kya kisi ke khuda ho

apne maston ki khairaat saqi
ek saghar mujhe bhi ata ho

kuchh raha bhi hai bimar-e-gham mein
ab dawa ho to kis ki dawa ho

aao mil lo shab-e-wada aa kar
subh tak phir khuda jaane kya ho

tu ne mujh ko kahin ka na rakkha
ai dil-e-zar tera bura ho

ghusse mein bhi raha pas-e-dushman
kah rahe hain ki tera bhala ho

tum ko 'bedam' hamin jaante hain
parsa ho bade parsa ho