tum mere ghar jo shab basar karte
raat bhar jashn baam-o-dar karte

tum jo aate mere tasawwur mein
mere sheron ko mo'atabar karte

chha gae hote sari duniya par
nek aamal tum agar karte

jaan lete tum us ki fitrat ko
sath us ke kabhi safar karte

tujh ko manzil ka gar pata hota
hum tujhe apna rahbar karte

multafit kyon hue ho ghairon par
tum mere haal par nazar karte

hum ko milta 'zaki' agar gustakh
zindagi us ki mukhtasar karte