tumhaara husn hai yakta chalo main man leta hun
koi tum sa nahin dekha chalo main man leta hun

agar mere liye kahte na hargiz e'tibar aata
wo auron ke liye roya chalo main man leta hun

mujhe malum hai wada-khilafi us ki fitrat hai
jo kahte ho nibhaega chalo main man leta hun

suna hai wo bahut nadim hua apne rawayye par
mujhe thukra ke pachhtaya chalo main man leta hun

jise main ne kabhi chaha tha apni jaan se badh kar
wo mera ho nahin paya chalo main man leta hun

yunhi to shahr mein hangama 'saghar' ho nahin sakta
wo nikle honge be-parda chalo main man leta hun