tumhaare sath jo lamhat the guzare hue
tumhaare baad wahi zist ke sahaare hue

zaban pe zang jo dekha to ye samajh aaya
zamane ho gae jaise use pukare hue

hamare baad hamein dhundte phirenge log
hamare baad kahenge bade khasare hue

akhir sham thi jab donon pas baithe the
ajib shakl thi donon ki jaise haare hue

qadam qadam pe milenge tumhein lahu ke nishan
hamare ishq ke ye bhi to istiare hue

main apni zat ki tarikiyon mein jab gum tha
tab us ki yaad ke raushan sabhi sitare hue